| Հարգելի՛ հանձնաժողով,
ՀՀ ԱՄՎՀ ԷԱՃԱՊՁԲ 26/12 ծածկագրով ընթացակարգի հրավերի տեխնիկական բնութագրերի ուսումնասիրության, ինչպես նաև համապատասխան դասի բազմաֆունկցիոնալ քաղաքային մաքրման մեքենաների շուկայի և արտադրողների հրապարակված տեխնիկական տվյալների համեմատական ուսումնասիրության արդյունքում առաջացել են հիմնավոր հարցեր՝ սահմանված տեխնիկական պահանջների՝ մրցակցային, համաչափ, ոչ խտրական և կարիքից օբյեկտիվորեն բխող լինելու վերաբերյալ։
Հարցումը ներկայացվում է հրավերի 1-ին մասի 3-րդ բաժնի, այդ թվում՝ 3.5 կետի, ինչպես նաև «Գնումների մասին» ՀՀ օրենքի 3-րդ, 13-րդ և 29-րդ հոդվածների և ՀՀ կառավարության 04.05.2017 թ. N 526-Ն որոշմամբ հաստատված «Գնումների գործընթացի կազմակերպման կարգի» 22-րդ կետի հիմքով։
**1. Իրավական հիմքերը**
«Գնումների մասին» ՀՀ օրենքի 3-րդ հոդվածի 2-րդ մասի համաձայն՝ գնումների գործընթացը պետք է կազմակերպվի մրցակցային, թափանցիկ, համաչափ, հրապարակային և ոչ խտրական հիմունքներով, ինչպես նաև պետք է ապահովվի մասնակիցների շրջանակի ընդլայնումը և նրանց միջև մրցակցության խրախուսումը։
Նույն օրենքի 13-րդ հոդվածի 1-ին և 2-րդ մասերի համաձայն՝ գնման առարկայի բնութագրերը պետք է ամբողջությամբ և հստակ նկարագրեն գնման առարկան, պետք է հավասար մրցակցային պայմաններ ապահովեն հնարավոր մասնակիցների համար, չպետք է առաջացնեն մրցակցության համար չհիմնավորված խոչընդոտներ և պետք է լինեն օբյեկտիվորեն հիմնավորված ու բխեն այն կարիքից, որի բավարարման համար իրականացվում է գնումը։
Օրենքի 13-րդ հոդվածի 5-րդ մասով սահմանված է նաև, որ գնման առարկայի հատկանիշները չպետք է պահանջ կամ հղում պարունակեն որևէ առևտրային նշանի, ֆիրմային անվանման, մոդելի, կոնկրետ աղբյուրի կամ արտադրողի նկատմամբ, բացառությամբ օրենքով նախատեսված դեպքերի։
ՀՀ կառավարության N 526-Ն որոշմամբ հաստատված կարգի 22-րդ կետի համաձայն՝ գնման առարկայի բնութագրերը սահմանելիս պետք է հաշվի առնել, որ դրանց պետք է բավարարեն **մեկից ավելի հնարավոր մասնակիցներ**, բացառությամբ նույն կետով նախատեսված հատուկ դեպքերի։
Հետևաբար, նույնիսկ եթե տեխնիկական բնութագրում ուղղակիորեն նշված չէ ապրանքային նշանը կամ արտադրողի անվանումը, բազմաթիվ խիստ նեղ և փոխկապակցված թվային պարամետրերի համակցությունը ենթակա է գնահատման վերոհիշյալ նորմերի տեսանկյունից, եթե դրա արդյունքում փաստացի հնարավոր է դառնում միայն մեկ կոնկրետ արտադրանքի կամ արտադրողի արտադրանքի առաջարկումը։
**2. Տեխնիկական բնութագրերի համակցությամբ մրցակցության սահմանափակման վերաբերյալ**
Հրավերով, ի թիվս այլ պահանջների, միաժամանակ սահմանված են հետևյալ խիստ նեղ տեխնիկական միջակայքները և արժեքները՝
* շարժիչի հզորություն՝ 46.34–50 կՎտ,
* աշխատանքային ծավալ՝ 2400–2500 սմ³,
* առավելագույն ոլորող մոմենտ՝ 190–200 Նմ,
* վառելիքի բաք՝ ոչ պակաս 58 լ,
* արտանետումների ստանդարտ՝ առնվազն Stage V,
* շրջադարձի շառավիղ՝ 2400–2500 մմ,
* անիվային բազա՝ 1700–1750 մմ,
* միջանիվային հեռավորություն՝ 1000–1020 մմ,
* առջևի և հետևի սռնիների թույլատրելի բեռնվածություն՝ յուրաքանչյուրը 1950–2050 կգ,
* զտաքաշ՝ 2000–2070 կգ,
* առավելագույն ընդհանուր թույլատրելի քաշ՝ 3400–3550 կգ,
* առավելագույն օգտակար բեռնվածություն՝ 1400–1470 կգ,
* երկխոզանակ համակարգով մեքենայի չափսեր՝ առնվազն 3970 × 1200 × 1979 մմ,
* աղբի տարայի ծավալ՝ 1450–1550 լ,
* մաքուր ջրի ծավալ՝ 190–200 լ,
* խոզանակների առավելագույն պտտման արագություն՝ 140–160 պտ/ր,
* բարձր ճնշման ջրի համակարգ՝ 155–165 բար,
* ինչպես նաև մի շարք նույնպիսի նեղ միջակայքներով սահմանված հիդրավլիկ, ձնամաքրման և աղ/ավազ տարածող սարքավորման պարամետրեր։
Կատարված շուկայական ուսումնասիրությամբ նշված հիմնական պարամետրերի ամբողջությանը առավել մոտ և տեխնիկական ցուցանիշների համակցությամբ հստակ նույնականացվող մեքենան **Kärcher MC 150** մոդելային շարքն է։
Մասնավորապես, արտադրողի հրապարակած MC 150 տվյալներում միաժամանակ առկա են 48 կՎտ հզորություն, 2434 սմ³ աշխատանքային ծավալ, Stage V, 1700 մմ անիվային բազա, 3500 կգ թույլատրելի ընդհանուր քաշ, 2450 մմ երկխոզանակ աշխատանքային լայնություն, 1500 լ աղբի տարա, 195 լ մաքուր ջուր և այլ՝ հրավերի նեղ միջակայքներին բնորոշ արժեքներ։
Մեր կողմից ուսումնասիրված այլ եվրոպական և ասիական արտադրողների համադրելի դասի արտադրանքների շարքում չի հայտնաբերվել երկրորդ անկախ արտադրողի սերիական մոդել, որը **միաժամանակ** բավարարի հրավերով սահմանված հիմնական տեխնիկական պահանջների ամբողջությանը։
Ընդ որում, առկա է նաև լրացուցիչ էական հանգամանք. ներկայում հրապարակված պաշտոնական Kärcher MC 150 տեխնիկական տվյալներով որոշ արժեքներ չեն բավարարում հենց հրավերով սահմանված պահանջներին։ Օրինակ՝ արտադրողի հրապարակած Stage V տարբերակի վառելիքի բաքը 50 լ է՝ հրավերով պահանջվող առնվազն 58 լ-ի փոխարեն, իսկ երկխոզանակ տարբերակի հրապարակված ընդհանուր երկարությունը 3774 մմ է՝ հրավերով պահանջվող առնվազն 3970 մմ-ի փոխարեն։
Այս հանգամանքը լրացուցիչ հիմք է ենթադրելու, որ հրավերի տեխնիկական բնութագիրը կազմվել է կոնկրետ արտադրանքի տեխնիկական ցուցանիշների հիմքով՝ որոշ ցուցանիշներ փոփոխելով կամ տարբեր կոնֆիգուրացիաների տվյալներ համակցելով։
Միաժամանակ տեխնիկական բնութագրում առկա են նաև պարզաբանման ենթակա կամ հնարավոր ներքին հակասություն պարունակող պահանջներ, այդ թվում՝ երկխոզանակ համակարգի աշխատանքային լայնության «2420–250 մմ» ձևակերպումը, որը թվային միջակայքի տեսքով միանշանակ մեկնաբանություն չունի։
**3. Խնդրում ենք պարզաբանել և հիմնավորել**
Վերոգրյալի հիման վրա խնդրում ենք՝
1. Ներկայացնել օբյեկտիվ տեխնիկական և գործառութային հիմնավորումը, թե պատվիրատուի կոնկրետ ո՞ր կարիքից է բխում վերոհիշյալ յուրաքանչյուր նեղ միջակայքի սահմանումը՝ մասնավորապես շարժիչի աշխատանքային ծավալի, ոլորող մոմենտի, անիվային բազայի, միջանիվային հեռավորության, սռնիների բեռնվածության, զտաքաշի, ընդհանուր քաշի, օգտակար բեռնվածության, մեքենայի գաբարիտների և այլ նման պարամետրերի մասով։
2. Պարզաբանել՝ տեխնիկական բնութագիրը մշակելիս կատարվե՞լ է արդյոք շուկայի ուսումնասիրություն և առկա՞ են մեկից ավելի իրարից անկախ արտադրողների սերիական արտադրության մեքենաներ, որոնք միաժամանակ բավարարում են հրավերով սահմանված բոլոր պարտադիր տեխնիկական պահանջներին։
3. Եթե այո, խնդրում ենք նշել առնվազն այն արտադրողների և մոդելների տվյալները, որոնց տեխնիկական հնարավորությունների հիմքով գնահատվել է, որ հրավերով սահմանված պահանջները մրցակցային են և չեն ստեղծում չհիմնավորված խոչընդոտ։
4. Եթե նման մեկից ավելի անկախ արտադրողների արտադրանքներ առկա չեն, խնդրում ենք պարզաբանել, թե ինչ իրավական և տեխնիկական հիմքով է հրավերի տեխնիկական բնութագիրը սահմանվել այնպիսի համակցությամբ, որը փաստացի հանգեցնում է մեկ կոնկրետ արտադրանքի/մոդելային շարքի նույնականացման կամ այլ համարժեք արտադրանքների մասնակցության անհնարինության։
5. Պարզաբանել «երկխոզանակ համակարգի աշխատանքային լայնություն՝ 2420–250 մմ» պահանջի ճշգրիտ իմաստը և, տեխնիկական վրիպակի առկայության դեպքում, կատարել համապատասխան ուղղում։
6. Վերանայել և օբյեկտիվորեն հիմնավորված կարիքով չպայմանավորված նեղ թվային միջակայքները փոխարինել կատարողական կամ գործառութային նվազագույն/առավելագույն պահանջներով՝ ապահովելով տարբեր արտադրողների տեխնիկապես համարժեք մեքենաների իրական մասնակցության հնարավորություն։
7. Եթե պատվիրատուն գտնում է, որ նշված նեղ միջակայքներից յուրաքանչյուրն անհրաժեշտ և անփոխարինելի է համայնքի կոնկրետ շահագործման պայմանների համար, խնդրում ենք հրապարակել համապատասխան տեխնիկական/ինժեներական հիմնավորումը՝ բացատրելով, թե ինչու նույն գործառույթն ապահովող, սակայն տվյալ ցուցանիշից փոքր-ինչ տարբերվող համարժեք մեքենան չի կարող բավարարել պատվիրատուի կարիքը։
**4. Եզրակացություն**
Կարծում ենք՝ տվյալ դեպքում հարցը միայն առանձին տեխնիկական ցուցանիշի մասին չէ, այլ բազմաթիվ խիստ նեղ պարամետրերի **կուտակային ազդեցության** մասին։ Այդ պահանջներից յուրաքանչյուրն առանձին կարող է թվալ ընդունելի, սակայն դրանց միաժամանակյա կիրառումը զգալիորեն նեղացնում է հնարավոր համարժեք արտադրանքների շրջանակը և, մեր կողմից կատարված շուկայական ուսումնասիրության արդյունքով, փաստացի ուղղորդում է դեպի մեկ կոնկրետ մոդելային հարթակ։
Նման սահմանափակումը, եթե այն չի բխում պատվիրատուի օբյեկտիվ և փաստաթղթավորված տեխնիկական կարիքից, կարող է չհամապատասխանել «Գնումների մասին» ՀՀ օրենքի 3-րդ հոդվածի 2-րդ մասով և 13-րդ հոդվածի 2-րդ մասով սահմանված մրցակցության, համաչափության, ոչ խտրականության և չհիմնավորված խոչընդոտների բացառման սկզբունքներին, ինչպես նաև ՀՀ կառավարության N 526-Ն որոշմամբ հաստատված կարգի 22-րդ կետի պահանջին։
Հաշվի առնելով վերոգրյալը՝ խնդրում ենք սահմանված կարգով տրամադրել պարզաբանում և, մրցակցության սահմանափակման վերաբերյալ ներկայացված հիմնավորումները ընդունելի համարելու դեպքում, կատարել հրավերի տեխնիկական բնութագրերի համապատասխան փոփոխություններ՝ ապահովելով մեկից ավելի հնարավոր մասնակիցների և տեխնիկապես համարժեք արտադրանքների իրական մասնակցության հնարավորություն։ | 2026-09-19 12:43:39 | Հարգելի՛ մասնակից, ի պատասխան Ձեր հարցմանը, հայտնում ենք, որ նախքան գնման ընթացակարգի հրապարակումը գնման պատասխանատու ստորաբաժանումն իրականացրել է թե՛ շուկայի, և թե՛ այլ քաղաքների նմանատիպ գնման ընթացակարգերի ուսումնասիրություններ, որի արդյունքում հանգել է այն եզրակացության, որ անհրաժեշտ է ձեռք բերել այնպիսի տեխնիկա, որը․
1. կունանա բնապահպանական ստանդարտ առնվազն STAGE V, քանի որ համայնքապետարանը նպատակ չունի փողոցների մաքրմանը զուգահեռ աղտոտել բնությունն ու մթնոլորտը,
2. վարորդի խցիկում կունենա 2 նստատեղ՝ հարմարավետ միջավայր ստեղծելով վարորդի և օժանդակ բանվորի աշխատանքային ընթացքում,
3. հաշվի առնելով քաղաքի մայթերի չափերը, թույլ կտա մեքենային անխոչընդոտ բարձրանալ դրանց վրա, մաքրել կեղտից ու փոշուց և ձյան շերտից, միևնույն ժամանակ դրա չափերը չեն վնասի մայթերի կողքին առկա սիզամարգերն ու կանաչ տարածքները, իսկ քաշը չի հանգեցնի մայթերի սալահատակի դեֆորմացիայի առաջացմանը,
4. կլինի բազմաֆունկցիոնալ, թույլ կտա կցել այլ սարքավորումներ և կցորդներ, որի արդյունքում մեքենան հնարավոր կլինի օգտագործել այլ նպատակներով։ Միևնույն ժամանակ մեքենան կունենա այնպիսի հնարավորություններ, ինչպիսք են ձյուն մաքրելն ու աղ ցանելը, փողոցների մաքրելը, ջրի բարձր ճնշման սարքի միջոցով փողոցների և աղբամանների լվացումները և այլն։
Ցանկանում ենք ավելացնել, որ թեև Պատվիրատուն ներկայացրել է նախընտրելի տեխնիկական բնութագրերը, սակայն թույլատրում է այլ տեխնիկական բնութագրերով ապրանքի ներկայացում, եթե դրա որակական հատկանիշները գերազանցում են հրավերով սահմանված պահանջները։
Իսկ ինչ վերաբերում է «երկխոզանակ համակարգի աշխատանքային լայնություն՝ 2420–250 մմ» պահանջին, ցանկանում ենք նշել, որ այն տեխնիկական վրիպակի հետևանք է, որը պետք է լիներ՝ Ավլող համակարգի աշխատանքային առավելագույն լայնությունը 2 կողային խոզանակով ֊ 2420 – 2500 մմ։ Уважаемый участник! В ответ на ваш запрос сообщаем, что перед объявлением процедуры закупки ответственное подразделение провело анализ рынка и аналогичных закупок в других городах. По итогам анализа было принято решение о необходимости приобретения техник |
Ապրանքի ամբողջական նկարագիր